發音準確優美係好事,但係如果變成一種階級,或者係一種批鬥心理,就唔係太健康喇。 今日香港廣東話入面,成日會將音節前面[ŋ-]嘅鼻音整走,就好似頭先出現過嘅例子,將我[ngo5]變成[o5],「我」哩個字,喺古漢語入面屬於一個叫做「疑母」,係古代韻書上面一個舌根鼻音嘅聲母。除咗「我」字之外, 其實「疑」字本身 ,同埋其他同哩個古音「疑」字有一樣聲母嘅字,都係屬於「疑母」,好似「魚」字、「玩」字,本身都係屬於「疑母」,屬於有鼻音嘅。 疑[ji4] 魚[jyu4] 玩[wun6] 好明顯哩啲字到今時今日,已經丟失咗哩個鼻音喇,但是點解我哋唔話哩啲係懶音呢? 原因好簡單,哩啲字呀 轉變嘅日子已經夠長,成為習慣同標準。 「疑」字唔見咗鼻音聲母,已經百幾年以上歷史,耐到根本連一個識講哩個音嘅人都冇剩。而今日廣東話先開始甩開「我」哩個[ŋ-]鼻音。只係短短哩十幾年先至比較流行,對於一啲仲保留鼻音讀法啲人嚟講,哩種冇咗鼻音嘅讀法,同自己腦入面嘅讀音有衝突,會總覺得哩啲人係異類嚟㗎。好自然就會睇返,哩兩個發音有咩分別呢,一個有鼻音,一個冇鼻音;然後又會睇返我同你有咩分別呢,你後生,我大過你,然後結論就係後生會為咗發音慳個鼻音,將你懶哩樣嘢套落你度 ,將個故事合理化,但係就忽視咗文字音韻,本身會變化嘅基本因素。 而家將鼻音ng丟失嘅人越嚟越多,假以時日,我們會見到「我、疑」都一律不帶鼻音,到了嗰個時候今日所謂嘅懶音,會變成新嘅標準發音。
語言係會發生變化嘅 ,而家嘅音同舊時嘅音唔同, 係一個非常自然嘅現象
如果你話懶音變化係唔可取嘅,我哋條界線究竟定喺邊呢?
我頭先提過嘅疑字魚字玩字,使唔使復辟古音? 好似早幾十年前粵語聲調,比而家多個高降調,喺嗰陣時「方糖」同「荒唐」係有分別嘅;「相與」同「雙乳」又係有分別嘅。我哋又使唔使復辟呢? 講到尾,我哋嘅判斷都係好主觀。喺廣州老一輩嘅人仲有唔少人保留高降調,但係丟失哩種聲調嘅人,壓倒性咁多過保留哩種聲調嘅人。當你聽哩啲老廣州人講嘢,你甚至會話:「佢講嘢怪怪地,有鄉音」。好似我哩啲喺香港出世,冇離開過香港嘅人,因為要教廣東話啲發音想發正啲,都會俾人話有口音㗎。始終語言大家都識講,但係有幾多人真正咁了解過佢吖,所以我都冇怪任何人。
咁講到尾喇,後生嘅懶音係咪需要改呢
我淨係覺得,懶音呢樣嘢,你有需要畀人知,甚至所有廣東話學習者都需要知道有哩一回事,有咩人會用,咩人唔用,點樣用。 而我哋作為母語者, 要去了解返廣東話而家出現緊嘅哩啲變化,至於要改定唔改,就由你自己去決定啦。
所謂懶音,都係由上一代慢慢改變,慢慢傳落嚟嘅
語言係一種溝通手段,唔係用嚟畀你玩分化分階級嘅,所謂後生講嘢唔清楚其實都係由上一代,慢慢改變,慢慢傳落嚟嘅,後生就唔係原罪嚟嘅,千祈唔好企喺高地, 講到好似唔關自己事咁。懶音 有唔少文獻資料搵到,早喺一百年前嘅廣州,就已經開始有而家所謂嘅懶音現象,好似一本由美國傳教士,喺1856年出版嘅《英華分韻撮要》。又有一本由一位對粵語發展好重要嘅人物—黃錫凌喺1941年出版嘅《粵音韻彙》都有所提及。如果真係想推廣你心目中嘅正音,不妨報讀我個課程,認識返廣東話有咩嘅底韻,同識返幾招推廣廣東話嘅手段先啦。 或者,可以幫到你。
一個專為廣東話母語者而設的廣東話普及課程
![](https://static.wixstatic.com/media/629858_f57e5a0fa39f47fb8a12526e0fefe98d~mv2.png/v1/fill/w_980,h_1389,al_c,q_90,usm_0.66_1.00_0.01,enc_auto/629858_f57e5a0fa39f47fb8a12526e0fefe98d~mv2.png)
Comments